top of page

Letzter Match der Volleyballerinnen

Text von Dorly Koch


Höt Obig möcht ech öppis zo euch säge, denn das esch mier sehr am Härze gläge.

Doch vo was ond wie wett ech euch brechte, ech probiers doch eifach mou met dechte.

Öb oswärts oder deheime do i üsere Halle, Volleyball tuet üs allne scho sehr guet gfalle.

E spannendi ond längi Saison esch es gsi, 14 Mätches hend doch gspöut müesse si.

Dodezue bruuchts aber emmer ganz vöu Lüüt, es heisst ned vergäbe vo nüd chonnt nüd.

Die drei Froue, d'Mäni, d'Joli ond d'Hedy Renggli, beherrschid ou meischterlich ehri Leiterämtli.

D'Täflerin, d'Schriiberin ond üsi souveräni Schirifrou, die send sehr wechtig denn die bruuchts ou.

Üsi treue Fans send gedoudig of de Bänkli gsässe, hei go 10 vor 10 luege das channsch grad vergässe.

Mier Spelerinne hend kämpft ond emmer alles gäh,mängisch hend mier üs Pönkt aber chli eifach lo näh.

Met doch sagehafte 58 Johr Altersdorchschnett, spelid mier i üsere Groppe aber de no zönftig met.

De 4. Schlossrang esch drom üsi verdienti Belohnig, süesser esch nor no e Ankebock met vöu Honig.

Drom bliibid mier am Ball ond gloubid fescht dra, hopp Wouhuse vou Gas ond vöu Freuid debii ha.

Vo üs Volleyballerinne gets jetz e feine Apéro, getreu üsem Motto eis hemmer emmer no gno.

De härzlechschti Dank scheck ech i jedi Rechtig, dass ihr das alli wössid esch mier sehr wechtig.

So langsam gönd mier jetz aber mini Idee us, d'Gedanke, d'Wörter ond ou scho fascht de Pfuus.

Gniesse tüend miers jetz ihr müend no ned goh, Prost metenand ond schön send ihr alli do.


 



 


34 Ansichten0 Kommentare

Comments


bottom of page